İnsanın eşq pərisi ilk an ağrı-acıları baş qaldıranda qəlbə dərd-sər verir. Həmin vaxt ürəkdən qopan çılğın hislər həyatın ən şirin təranəsi kimi olur. Dünyaya yeni gələn hər körpənin də layla səsinə açılan nitqi həyatın ritmi, o səsin ahəngindəki mənalar qədər parıltılı olur. İllər körpə çağları uşaq, sonra da yeniyetmə təbəssümünə bükdükcə həyat öz işıqlı və qaranlıq hücrələri ilə cəmiyyətə dərin mənalar açır. Və bir gün hər uşaq üçün məktəb həyatı başlayır. Altı-yeddi yaşlı uşaqlar kövrək, hürkək addımlarla analarının əllərindən tutub hələ fərqinə varmadıqları bir məkana - onları bir gün öz anaları kimi yola salacaq təhsil ocağına üz tuturlar. Elə ilk gündən sinif otaqları arasında sıxılır, sonra da hərf-söz öyrəndikcə məktəb həyatına uyğunlaşırlar... Bu il də hər il olduğu kimi yüzlərlə fidan, göyərçin balalar birinci sinfə qədəm qoydular.



Məktəb həyatı onları elə ilk gündən öz anaları kimi qoynuna aldı, sabaha köç edən qəlb çırpıntıları ilə üz-üzə qoydu. Sanki hansısa bir səs pıçıltı ilə dedi ki, siz sabahın qurucuları olacaqsınız. Vətən sizə arxalanır. Buna görə birinci sinfə qədəm qoyan uşaqların çöhrələrində bir işıq, alovlu bir təbəssüm çırpınır.
Əhmədzadə Xanım da bu il birinci sinfə qədəm qoyan şagirdlər sırasındadır. Qaradag rayonun 139 - nömrəli tam orta məktəbin müəlliməsi
Mila Zeynalovanın şagirdi kimi təhsilə vəsiqə alan Xanım da ilk anın təəssüratını hələ çox uzun illər yaddaşında çözələyəcək. Yalnız onuncu sinfi bitirəndə anlayacaq ki, ilk gün nə üçün bu qədər həyəcanlı, kövrək və hürkək olub.
Əziz balamız Xanım ! Məktəb həyatın mübarək. Ən səmimi arzularla baban, nənən , atan , anan arzu edirik ki, taledən də, bəxtdən də yarıyasan. Qoynuna addım atdığın məktəb sənə elm, kamal verəcək. Bir gün elmli, kamil bir insan olacaqsan . Təmiz arzularının, saf diləklərinin müvəffəqiyyətini yaşayasan həmişə. İlk dərs günün mübarək!

A.J.B -nin üzvü
Xəyalə İbrahimli.