Bilirik ki, Milli Mətbuat 147 il əvvəl – 22 iyul 1875-ci ildə Həsən bəy Zərdabi tərəfindən ilk çap nəşri - "Əkinçi"qəzetinin buraxıldığı o müdhiş və o möhtəşəm günün təfərrüatları ilə pərvəriş tapıb və hər il 22 iyul tarixi ölkəmizdə milli mətbuat günü kimi qeyd edilir. Ötən əsrin 80-ci illərindən milli mətbuat azad və demokratik mətbuat missiyasının, insanların düşüncə və sözlərinə hörmətin, yeniləşən informasiya vasitəsilə operativ məlumatlandırmanın, plüralizm və tolerantlıq ideyalarının daşıyıcısı olub. Bu gün tez-tez dördüncü hakimiyyət adlandırılan mətbuat Azərbaycanda bir çox proseslərin şəffaflığına və hakimiyyətin üç "klassik" qolunun - icra, qanunverici və məhkəmə fəaliyyətinin yaxşılaşdırılmasında başlıca rol oynayır.
Ölkəmizdə mindən çox kütləvi informasiya vasitəsi qeydiyyatdan keçib. Azərbaycan mediası artıq qlobal informasiya sisteminə qoşulub. Bir çox demokratik ölkələrdə olduğu kimi, Azərbaycanda da "Mətbuat haqqında" Qanun qəbul edilib. Azad mətbuatın inkişafı, iqtisadi müstəqilliyin təmin edilməsi, reklam bazarında müəyyən nöqsanların aradan qaldırılması, sosial vəziyyətin yaxşılaşdırılması məqsədilə xüsusi proqram hazırlanıb. Azərbaycanda insan hüquqları, siyasi plüralizm, vətəndaş cəmiyyətinin mövcudluğu demokratik institut kimi formalaşdırılmış müstəqil kütləvi informasiya vasitələrinin fəaliyyətində, onların inkişafı üçün yaradılan hüquqi təminatlarda öz təsdiqini tapır.
Dövlətimiz mətbuata böyük dəyər verir. Azərbaycan Respublikasının 1995-ci ilin noyabrında ümumxalq səsverməsi ilə qəbul edilən Konstitusiyasının 50-ci maddəsində söz, azad məlumat toplamaq azadlıqları və digər azadlıqlar möhkəmləndirilib. Konstitusiyanın digər Qanunverici Aktlarında da möhkəmləndirilmiş azadlıqlar - vətəndaşların qanuni yolla informasiya tapmaq, almaq, hazırlamaq, ötürmək və yaymaq hüquqları dövlət təminatına əsaslanır.
Azərbaycanın ümummilli ilideri Heydər Əliyevin 1998-ci il 16 avqust tarixli "Azərbaycan Respublikasında söz, düşüncə və informasiya azadlığının təmin edilməsi tədbirləri haqqında" fərmanı ilə ölkədə kütləvi informasiya vasitələri üzərində senzura ləğv edilib. Bu fərman kütləvi infromasiya vasitələrinin sürətli inkişafına ciddi təkan verməklə yanaşı, onların rasionallığının artırılması sahəsində geniş Dövlət Proqramının əsas istiqamətlərini müəyyən edib.
Xoş haldır ki, azad mətbuat özünün ictimai və dövlət ənənələrini bu gün də inamlı şəkildə qoruyur və davam etdirir. Bu səbəbdəndir ki, Azərbaycan öz müstəqilliyini bərpa etdikdən sonra bir çox milli-mənəvi dəyərlərə qayıdış mətbuat sahəsində də özünü göstərir.
Biz - mətbuata, media işinə xüsusi önəm verən qələm adamları hazırda da Zərdabi ənənlərini inamla davam etdirir, söz azadlığı proseslərini jurnalistika dəyərləri ilə ehtiva edirik. Fürsətdən istifadə edib özüm də daxil olmaqla bütün qələm əhlini Milli Mətbuat günü münasibətilə təbrik edir, onlara daim sözün xidmətində şərəflə durmaq ucalığı arzulayıram.

Raqif Nazimoğlu