Argentinalı ulduz futbolçu Lionel Messinin 13 yaşında ikən “Barselona”ya transferi üçün ilk imzaları olan salfet hərracda satışa çıxarılacaq.

Capar.info xarici mediaya istinadla bildirir ki, İngiltərənin Bonhams hərrac evindən verilən açıqlamaya görə, o zamankı “Barselona”nın idman direktoru Karles Rexaç, məsləhətçi Josep Minquella və menecer Horakio Qaqqiolinin imzaları olan salfetin açılış qiyməti 300 min funt sterlinq olacaq.

Mart ayında hərraca çıxarılacaq salfetdə deyilir: “14 dekabr 2000-ci ildə Barselonada, Minquella və Horakionun otağında Rexaç Lionel Messi ilə öz məsuliyyəti altında və heç bir şeydən asılı olmayaraq, razılaşdırılmış məbləğlərə uyğun olaraq müqavilə bağlamağa razılaşır”.

Transferlə bağlı xəbərlərin olmamasından narahat olan Rexaçın Messinin atasını “Barselona”dakı tennis klubuna nahara dəvət etdiyi və müqavilənin orada imzalandığı bildirilib.

Qeyd edilib ki, sözügedən müqavilə eyni gündə “Barselona”nın prezidenti Joan Qaspart tərəfindən təsdiqlənib və bir ay sonra rəsmiləşib.