Biləsuvarda arvadını döyən kişiyə cinayət işi açılıb.

Capar.info -nın məlumatına görə, hadisə Xırmandalı kəndində baş verib.

İki uşaq atası olan və fəhlə işləyən 34 yaşlı İsrafil Dadaşov (ad və soyad şərtidir) axşam dostları ilə yeyib içəndən sonra evə gəlib. Evdə saxladığı quzulardan birinin xəstə olduğunu görərək, arvadını günahkar bilib. O, arvadına illərlə mal-qara saxladığını, lakin bir quzuya süd əmizdirməyi bacarmadığını irad bildirib. Bu zaman ər-arvad arasında mübahisə yaranıb. Mübahisə zamanı İsrafil qadının başına 3-4 dəfə yumruqla, ayaqlarına isə təpiklə zərbələr vurub. Sonra isə o, gedib yatıb. Nəticədə qadın xəsarətlər alıb.

Bu faktla bağlı İsrafil Dadaşov barəsində Cinayət Məcəlləsinin 128-ci (qəsdən sağlamlığa yüngül zərərvurma) maddəsilə cinayət işi açılıb.

Təqsirləndirilən şəxs ifadəsində əməlindən peşman olduğunu deyib. O, arvadı ilə barışdığını və qadının ona qarşı şikayəti olmadığını, həmçinin hazırda bir yerdə yaşadıqlarını bildirib. Zərərçəkən şəxs də həmçinin ərini bağışladığını və ona cəza verilməməsini xahiş edib.

Biləsuvar rayon Məhkəməsinin qərarı ilə İsrafil Dadaşov barəsində 360 saatlıq ictimai işlər növündə cəza təyin edilib.