Qazaxıstanın “Xan-Tenqri” klubunun 19 yaşlı futbolçusu Dias Toleu Qazaxıstan çempionatının Birinci Liqasının 25-ci turunda “Ekibastuz” komandasına qarşı keçirilən oyun zamanı halı pisləşdikdən sonra dünyasını dəyişib.

Capar.info xəbər verir ki, hadisə barədə məlumatı Qazaxıstan Futbol Federasiyası yayıb.

Oyun dünən baş tutub. Oyunun 62-ci dəqiqəsində Toleu əvvəlcə meydançada oturub, sonra isə ot üzərinə uzanıb. Bir müddət sonra komandanın həkimi meydançaya daxil olub, lakin futbolçunun vəziyyəti pisləşib və o, ayağa qalxa bilməyib. Toleu xərəkdə meydandan çıxarılaraq xəstəxanaya aparılıb.

Oyun bitdikdən sonra Qazaxıstan Futbol Federasiyası sosial şəbəkələrdə Toleunun vəfat etdiyini açıqlayıb. Yarımmüdafiəçinin ölüm səbəbi hələlik açıqlanmayıb. Federasiyanın məlumatına görə, yaxın vaxtlarda hadisəni araşdırmaq üçün xüsusi komissiya yaradılacaq və bu iş müvafiq orqanlarla birgə aparılacaq.

Dias Toleu Almatı “Kayrat” klubunun yetirməsi olub. Bu mövsüm “Xan-Tenqri”nin heyətində 25 oyun keçirib, 3 qol vurub və 4 məhsuldar ötürmə verib.