Çuvaşiya Respublikasında 72 yaşlı rusiyalı təqaüdçü bir sahibkarı öldürməkdə ittiham olunaraq 12 il ciddi rejimli həbs cəzasına və 70 min rubl məbləğində cəriməyə məhkum edilib.

Capar.info Rusiya mediasına istinadla xəbər verir ki, məhkəmənin müəyyən etdiyinə görə, təqsirləndirilən şəxs və zərərçəkmiş arasında şəxsi ədavət olub. Yanvarın 2-də diqqət çəkməmək və kimliyini gizlətmək məqsədilə təqaüdçü Şaxta Baba kostyumu geyinərək Kanaş şəhərindəki mağazaya daxil olub və iki lüləli tüfəngdən düzəltdiyi obrezlə sahibkara atəş açıb. Nəticədə kişi ölüb.

İlkin dindirmələr zamanı kişi cinayətlə əlaqəsini inkar edib. Lakin istintaq tədbirləri onun ifadələrini təkzib edib və cinayətə birbaşa aidiyyəti olduğunu sübut edib. Xüsusilə, Şaxta Baba kostyumunda tanıma və səs üzrə identifikasiya aparılıb.