Xarici vətəndaş Rusiyaya dəyəri təxminən 14 milyon rubl olan zinət əşyaları gətirməyə cəhd edib. O, “yaşıl dəhliz”dən keçərkən gömrükçülər bəyan edilməli olan bilərziklər, sırğalar və digər əşyalar aşkar ediblər.

Capar.info yerli mediaya istinadla bildirir ki, İstanbuldan gələn vətəndaşın yanında məşhur brendlərə məxsus 15 ədəd qızıl-zinət əşyası olub. Onlar hava limanının çıxışında təsadüfi yoxlamalar zamanı əl metal detektoru vasitəsilə aşkar ediliblər. Mütəxəssis müəyyən edib ki, bütün zinət əşyaları orijinaldır. Almaz, ametist və malaxit əlavələri olan 750 karatlıq qızıldan hazırlanıb.

Əcnəbi nəzərə almayıb ki, dəyəri 10 min avrodan çox olan qiymətli əşyaları sərhəddən keçirərkən, bu məbləğdən artıq olan dəyərin 30 faizini təşkil edən rüsum ödənilməlidir. O, sadəcə olaraq zinət əşyalarını şalvarının ciblərinə doldurub və ölkəyə qaçaq yolla keçirməyə ümid edib. Əcnəbinin sözlərinə görə, o, zinət əşyalarını dostları və həmkarları üçün hədiyyə kimi aparırmış.

Nəticədə strateji əhəmiyyətli malların, sərvətlərin və ya mədəni sərvətlərin külli miqdarda sərhəddən keçirilməsinə görə cəza nəzərdə tutan maddə ilə cinayət işi açılıb.