capar.info: - 44 günlük müharibədən bir ildən artıq vaxt ötməsinə baxmayaraq, Ermənistan qoşunlarını Azərbaycan ərazisindən tamamilə çıxartmaq istəmir.

Hətta Ermənistan Azərbaycan ərazisinə yeni silahlı birləşmələr göndərməyə cəhd edir. Dekabrın 3-də 15 nəfər Ermənistan əsgərinin mülki geyimdə Laçın dəhlizindən keçərək Qarabağa daxil olmaq cəhdinin qarşısı alınıb. Hətta sosial şəbəkələrdə erməni həbi qulluqçuların Azərbaycan tərəfindən saxlanılmasına dair məlumatlar da yayılıb. Lakin Ermənistanın təxribatı bununla yekunlaşmayıb. Dekabrın 4-də Ermənistan parlamentinin bir qrup deputatı qanunsuz olaraq Xankəndinə səfər edərək separatçıların nümayəndələri ilə görüş keçirib. Buna etiraz olaraq, Azərbaycanın xarici işlər naziri Ceyhun Bayramov ATƏT-in Xarici İşlər Nazirləri Şurasının Stokholmda keçirilən iclası çərçivəsində ermənistanlı həmkarı Ararat Mirzoyanla görüşdən imtina edib.

Ermənistanın bu mövqeyi 2020-ci il noyabrın 10-da Azərbaycan və Rusiya ilə birlikdə imzalanmış üçtərəfli Bəyanatın 4-cü bəndinin icrası məsələsini gündəmə gətirib. Həmin bəndə əsasən, Rusiya Federasiyasının sülhməramlı kontingenti erməni silahlı qüvvələrinin Azərbaycan ərazisindən çıxarılması ilə paralel şəkildə yerləşdirilir. Lakin Ermənistan bu öhdəliyi yerinə yetirməkdən yayınır. Halbuki, Baş nazir Nikol Paşinyanın 2021-ci il fevralın 9-da imzaladığı fərmana görə, Ermənistan Respublikasında həqiqi hərbi xidmətə çağırılmış hərbi qulluqçular başqa dövlətin ərazisində xidmət keçə bilməz. Buna baxmayaraq, Ermənistan yenə də Qarabağa əsgər göndərməklə Azərbaycan ərazilərinə iddiasını ortaya qoyur.

Siyasi ekspertlər isə hesab edir ki, hazırda Azərbaycan danışıqlar prosesində əsas prioritet məsələ kimi Ermənistan qoşunlarının Qarabağdan çıxarılmasına dair öhdəliyin yerinə yetirilməsini qaldırmalıdır.

Danışıqlar prosesində Zəngəzur dəhlizinin açılması, sərhədlərin delimitasiyası və demarkasiyası ilə bağlı müzakirələrin ön plana keçməsindən istifadə edən Ermənistan 4-cü bəndin icrasından yayınmağa çalışır.

Təhlükəsizlik məsələləri üzrə ekspert İlham İsmayıl Cebhe.info-ya açıqlamasında bildirib ki, 2020-ci il 10 noyabr Bəyanatının ən vacib bəndləri yerinə yetirməyib. Bunlardan biri Ermənistan silahlı qüvvələrinin Azərbaycan ərazisindən çıxarılmasıdır. Ermənistan dəfələrlə hərbçilərini Azərbaycandan çıxartdığına dair görüntü yaratsa da, 10 mindən artıq silahlı qüvvəsi arsenalı ilə birlikdə Qarabağda qalmaqdadır:

“Bunun əsas təsdiqi Ermənistanın keçmiş müdafiə naziri Arşak Karapetyanın Azərbaycan ərazisinə gəlib işğalçı qüvvələrlə görüşməsi oldu. Yəni Ermənistan Silahlı Qüvvələri Azərbaycan ərazisində qalır və çox təəssüf ki, Rusiya sülhməramlıları nə 4-cü bəndin icrasını, nə də məcburi köçkünlərin öz evlərinə qayıtmasını tələb edir. Stokholmda Azərbaycanın xarici işlər naziri ilk dəfə olaraq, Ermənistan Silahlı Qüvvələrinin Qarabağda qaldığını bəyan etdi.

Bu, çox vacib məqam idi və erməni deputatların təxribatçı səfərinə cavab olaraq düzgün addımdır. Halbuki, ermənilər Soçi görüşünü də təxribat edir. Ona görə də məsələni daha sərt qoymaq lazımdır. Ermənistanın xarici işlər naziri Ararat Mirzoyanın Stokholmdakı çıxışı da Azərbaycanı ittiham üzərində qurulub və Minsk Qrupunun vasitəçilik fəaliyyətini bərpa etməyə yönəlib. Soçi görüşündə imzalanmış ikitərəfli komissiyanın tarixi bəyanatda göstərilmədiyinə görə onun nə vaxt başlayacağı məlum deyil. Ermənistan delimitasiya və demarkasiya işləri ilə məşğul olmamaq üçün pozuculuq işləri törədir. Rusiya isə ikitərəfli komissiyanın yaradılmaması üçün ortaya konkret mövqe qoymayıb.

Bu baxımdan, Azərbaycan Prezidenti ilə Ermənistanın Baş nazirinin Brüssel görüşünə ümid etmək lazımdır. Əgər Brüssel görüşündə konkret nəticə əldə olunmasa, deməli, Paşinyan başda olmaqla Ermənistan hakimiyyəti bu prosesi pozmağa cəhd edir. Ermənistan məsələni uzatmaq istəyir. Hətta razılıq əldə olunsa belə, bu yolların çəkilməsi üçün iki ildən artıq vaxt lazımdır. Amma Azərbaycanın ərazi bütövlüyünün təmini və Qarabağın probleminin həlli üçün 10 noyabr Bəyanatının bütün bəndləri yerinə yetirilməlidir. Biz bütün diqqətimizi yaınız dəhliz və sərhədlərin müəyyənləşməsi məsələlərinə yönəltməməliyik. Bütün məsələlər paralel həyata keçirilməlidir. Azərbaycanın ərazi bütövlüyünü tam təmin etmək üçün Rusiya ilə ciddi danışıqlara başlamalıyıq”.

İlham İsmayıl hesab edir ki, Qarabağda terrorçu qrupların tərk-silah edilməsi və Ermənistan qoşunlarının Azərbaycandan çıxarılması ilə Rusiya sülhmərmalıları məşğul olmalıdır. Çünki 10 noyabr Bəyanatında icra və nəzarət işi Rusiya sülhmlıramlılarına həvalə olunub.//dia.az