capar.info : - “Taliban” qruplaşmasının Əfqanıstanda hakimiyyəti ələ keçirməsi və ölkədəki xaotik vəziyyətin dərinləşməsi bölgədə qaçqın probleminin yenidən gündəmə gəlməsinə səbəb olub. Əfqanıstanda baş verən hadisələrdən sonra əhalinin böyük bir hissəsi yeganə çıxış yolunu ölkədən baş götürüb qaçmaqda görüb. Türkiyə-İran sərhədi vasitəsilə qanunsuz yollarla Türkiyəyə daxil olan əfqan mühacirlərin vəziyyəti son həftələr geniş müzakirə olunur.

Belə bir vəziyyəti nəzərə aldıqda, görəsən, Əfqanıstandan ölkəmizə mühacirət etmək istəyənlər varmı?

Dövlət Miqrasiya Xidmətinin İctimaiyyətlə əlaqələr idarəsindən Lent.az-a verilən məlumata görə, hələlik əfqanlar mühacirət üçün kömək istəməyiblər:

“Əfqanıstanda baş verən son hadisələrdən sonra qaçqın statusu almaq üçün heç bir əfqan müraciət etməyib”.

Onu da qeyd edək ki, Türkiyə də öz növbəsində var gücü ilə qaçqınların qarşısını almağa çalışır. Türkiyə hökuməti bu məqsədlə İranla sərhəddə beton divarlar çəkir. Bu ölkə ərazisində onsuz da Suriya, Livan və İraqdan gəlmiş 4 milyon qaçqın məskunlaşıb.

Xatırladaq ki, 20 il bundan əvvəl "Taliban" Əfqanıstanda hakimiyyətə gələndə təxminən 1000 nəfərə yaxın əfqanıstanlı – əfşarlar, xəzərlər, puştunlar, ölkənin digər türkdilli və farsdilli nümayəndələri Azərbaycanda özünə sığınacaq tapmışdılar. Ancaq onların hamısı ölkəmizdə qalmadı. Son 10-15 il ərzində Birləşmiş Millətlər Təşkilatının Qaçqınlar üzrə Ali Komissarlığının xətti ilə bir neçə yüz insan Azərbaycandan üçüncü ölkələrə yönləndiriliblər. Bu təşkilatın sayəsində indi onlar ABŞ, Kanada və Avropa ölkələrində yaşayırlar.