“Betis” “Mançester Yunayted”in keçmiş qapıçısı David de Xea ilə danışıqlar aparır.

Capar.info xarici KİV-ə istinadla bildirir ki, “Betis”in idman direktoru Ramon Planes bu həftə 33 yaşlı qolkiperlə görüş keçirib və bu görüşdə hər iki tərəf razılıq əldə etməkdə maraqlı olub.

İspaniya klubu qış transfer pəncərəsində qapıçı mövqeyinə dərinlik qatmaq istəyir. Hazırda “Betis”in əsas qapıçısı yoxdur. 40 yaşlı çilili Klaudio Bravo və 29 yaşlı portuqaliyalı Rui Silva oyun vaxtını bölüşürlər.

Keçən yay De Xea İngiltərə klubunda 12 il oynadıqdan sonra müqaviləsinin başa çatması səbəbindən “Mançester Yunayted”dən ayrılıb. İspaniyalı qolkiper Səudiyyə Ərəbistanından gələn bir neçə təklifi rədd edərək özünə yeni komanda tapa bilməyib. De Xeanın idman karyerasını bitirməyi düşündüyü bildirilirdi.

De Xea 2011-ci ilin yayında “Atletiko Madrid”dən “Mançester Yunayted”ə keçib. Ümumilikdə o, mankunianlıların heyətində 545 oyun keçirib, bu oyunda 590 qol buraxıb və 190 dəfə qapısını toxunulmaz saxlayıb. “Yunayted” ilə birlikdə İngiltərə çempionu və ölkə kubokunun qalibi olub. İki dəfə İngiltərə Liqa Kubokunu, üç dəfə İngiltərə Super Kubokunu qazanıb. Həmçinin Avropa Liqasının qalibi olub.