“Mançester Siti”nin sahibi Şeyx Mənsur Britaniyanın xarici işlər naziri Ceyms Kleverlinin təşkilatçılığı ilə istintaqa cəlb edilib.

Capar.info Goal.com” saytına istinadla xəbər verir ki, “vətəndaşların” himayədarı Rusiya ilə əlaqəli olmaqda şübhəli bilinir.

İngiltərə hüquq-mühafizə orqanlarının məlumatına görə, 2008-ci ilin avqust ayından Mançester klubuna sahib olan Mənsur Ukraynada xüsusi hərbi əməliyyat başlayandan sonra rus maqnatlarına vəsaitlərini İngiltərədən Birləşmiş Ərəb Əmirliklərinə köçürməyə kömək edib.
52 yaşlı şeyx Birləşmiş Ərəb Əmirliklərinin vitse-prezidentidir və onun sərvəti təxminən 16 milyard avro qiymətləndirilir. Bu heyrətamiz rəqəm son illərdə “Mançester Siti”nin Premyer Liqadakı üstünlüyünü izah etmək üçün bir yoldur.

Lakin Britaniya hökumətinin irəli sürdüyü ittihamlar sənədləşdirilərsə, o, klubu itirə bilər.

Premyer Liqanın yeni qaydalarına əsasən, klub sahibləri və direktorlarının cinayət əməllərində yaxud insan hüquqlarının pozulmasında iştirak etdikləri aşkar edilərsə, tutduqları vəzifələrdən uzaqlaşdırıla bilərlər.