“Qərb-Rusiya danışıqlarının ilkin nəticələri onu deməyə əsas verir ki, ciddi bir anlaşma olmayacaq və ya Qərb danışıqları uzatmağa cəhd edəcək. Onsuz da Kreml elə şərtlər irəli sürüb ki, anlaşma olmasın”. capar.info reyting.az-a istinadən xəbər verir ki, bunu Real Partiyasının funksioneri Natiq Cəfərli deyib.

Onun fikrincə, mümkün ssenarilərdən biri odur ki, Rusiya Donbası, qondarma qurumlar olan “DLR” və “LNR”-i rəsmən tanısın, tanıyan kimi də Abxaziya örnəyində olduğu kimi onlarla hərbi-strateji ittifaq qursun, müqavilələr bağlasın, rəsmi şəkildə hərbi yardım üçün əsaslar yaransın:

“Növbəti addım kimi Rusiyanın özü yox, tanıdığı qondarma qurumlar Ukrayna ilə müharibəyə başlayır və ya tanınmadan sonra Ukraynanın özü onlara qarşı hərbi əməliyyatlara strat verir. Bu vəziyyətdə Ukrayna ilə Rusiya birbaşa müharibə etmir, Kreml köhnə taktikası olan qondarma qurumların əli ilə öz maraqlarını hərbi yolla təmin etməyə başlayır. Nəticədə Kreml qondarma qurumların əli ilə Ukraynadan yeni ərazilər qoparmağa, Ukraynanın Azov dənizinə çıxışını tamamən bağlamağa çalışacaq. Əsas hədəflərdən biri Azov dənizində Britaniya ilə birlikdə Ukraynanın qurmaq üzrə olduğu hərbi-dəniz bazasını məhv etmək olacaq”.

N. Cəfərlinin qənaətincə, çox ağır dövrdür, Putin çox tələsir, artıq hadisələri sürətləndirir, nədən tələsdiyi haqqında bir neçə dəfə deyib.

N. Cəfərlinin sözlərinə görə, Azərbaycan üçün önəmli məsələ odur ki, Xankəndi və ətrafında müvəqqəti yerləşdirilən Rusiya “sülhməramlıları” doğrudan da müvəqqəti olsunlar və onların çıxarılması dövlət siyasətimizin əsas hədəfi olmalıdır: “Bunun üçün diplomatik, siyasi, iqtisadi addımların doğru alqoritmi yaradılmalıdır. Çətindir, amma siyasət həm də mümkünlük sənəti, çətin olanı mümkün etmək bacarığıdır. Rusiya əsgərinin Xankəndi və ətrafında qalması ölkənin gələcəyinə, müstəqilliyinə ciddi təhdidlər yaradır, hətta günün birində bu gün Xankəndində olan qondarma qurumu de-fakto tanıyan Kreml, sabah onları de-yure tanıyıb, bir ömür orda qalmaq üçün o qondarma qurumdan istifadə edə bilər”.