Capar.info xəbər verir ki, jurnalist Cavanşir Həsənli özünün Facebook hesabında Azərbaycan Avtomobil Yolları Dövlət Agentliyinin sabiq sədri Saleh Məmmədovla bağlı maraqlı məlumat paylaşıb. Paylaşımda iddia olunur ki, Saleh Məmmədov Almaniyada şəriklik əsasında iri yaşayış kompleksi layihəsini həyata keçirir.

Jurnalistin paylaşdığı məlumata əsasən, söhbət ümumilikdə 47 mənzildən ibarət 2 yaşayış binasının inşasından gedir. Bildirilir ki, layihənin ümumi investisiya dəyəri təxminən 13–15 milyon avro təşkil edir.

Paylaşımda qeyd olunur ki, tikinti layihəsinin rəsmi planına əsasən, yaşayış binalarının 2027-ci ilin yayında və ya ilin sonlarına qədər tam başa çatdırılaraq istifadəyə verilməsi nəzərdə tutulub.

Cavanşir Həsənli paylaşımına layihəyə aid olduğunu bildirdiyi fotoşəkli də əlavə edib və görüntünün orijinal olduğunu vurğulayıb.

Qeyd edək ki, sözügedən məlumat jurnalist Cavanşir Həsənlinin sosial şəbəkə hesabında səsləndirdiyi iddialara əsaslanır. Hazırda bu iddialarla bağlı Saleh Məmmədov və ya onun nümayəndələri tərəfindən hər hansı rəsmi açıqlama verilməyib.