capar.info : - “Hələlik Azərbaycanla Ermənistan arasında sülh müqaviləsi imzalanmayıb. Bu da o deməkdir ki, müharibə davam edir. Bu səbəbdən də Azərbaycan ərazisi olan və hazırda rus sülhməramlıların səlahiyyət zonası sayılan ərazidən bizə qarşı təxribatlar anlaşılandır. Ümumiyyətlə, sülh müqaviləsi imzalanmayana qədər belə təxribatları mümkün sayıram”.

Bu sözləri Reyting.az-a Azərbaycanın sabiq baş naziri, Xalq Partiyasının sədri Pənah Hüseyn son günlər rus sülhməramlıların məsuliyyət zonasına aid olan ərazilərdəki separatçı ermənilərin Azərbaycan əsgərlərini hədəfə alması və təxribatçı hərəkətlərini şərh edərkən deyib.

Pənah Hüseyn bildirib ki, 3000-3500 kvadratkilometrlik böyük bir əraziyə Rusiya silahlı qüvvələrinin sülhməramlı kontingenti nəzarət edir və orada müəyyən ocaqlar var: “Nə qədər ki, bu ocaqlar qalır, təxribatlar da olacaq. Sadəcə, bu istiqamətdə Azərbaycan tərəfi daha ciddi və kəskin mövqe ortaya qoymalıdır ki, revanşist qüvvələrin ümidləri son közünə qədər sönsün və geriyə dönüşün olmayacağını qəbul etsinlər”.

P. Hüseyn qeyd edib ki, əslində Azərbaycanın bu kimi hallara kəskin reaksiya verməsinə paralel olaraq hər şeyə hazır olmaq lazımdır: “Yəni anti-terror əməliyyatlarından tutmuş silahlı qüvvələrdən istifadə etməklə müqavimətə qədər. Məncə, hər şeyə hazır olmalıyıq. Ən vacibi isə Azərbaycanla Ermənistan arasında sülh müqaviləsi bağlanmalı, tərəflər bir-birini tanımalıdır. Bundan sonra hansısa münasibətlər sistemindən danışmaq daha asan ola bilər”