Mayın 17-də Milli Məclis Sədrinin müavini, Gənclər və idman komitəsinin sədri Adil Əliyev Vətən müharibəsində arxa cəbhədə fəallığı ilə seçilmiş bir qrup jurnalist və siyasi şərhçilərlə görüşüb.
Görüş zamanı Adil Əliyev Şanlı tariximizin ən böyük hadisələrindən biri olan Vətən müharibəsindən söhbət açaraq bildirib ki, Müzəffər Ali Baş Komandan, Prezident İlham Əliyevin rəhbərliyi ilə Rəşadətli Ordumuzun uzun illərdir işğal altında qalan torpaqlarımızı düşmən işğalından azad etməsi hamımızın qürur mənbəyidir. Ümummilli lider Heydər Əliyevin dövründə başlanmış ordu quruculuğu, yüksəkixtisaslı hərbi qulluqçuların hazırlanması, habelə gənc nəslin vətənpərvər ruhda tərbiyə edilməsi, idmanda kütləviliyin təmin edilməsi siyasəti Prezident İlham Əliyev tərəfindən uğurla davam etdirilir. Bu uğurlu siyasətin sayəsində döyüş meydanında misilsiz qələbəmiz təmin olundu. Düşmənin döyüş meydanında məğlub edilərək geri çəkilməsi ilə yanaşı, diplomatik sahədə də uğurlarımız bizi qələbəyə qovuşdurdu.
Vitse-spiker diqqətə çatdırıb ki, Ermənistan tərəfinin məğlubiyyətə uğrayaraq imzaladığı kapitulyasiya bir neçə rayonumuzun bir güllə belə atılmadan azad olunması ilə nəticələndi və ölkəmiz Birləşmiş Millətlər Təşkilatının Təhlükəsizlik Şurasının qəbul etdiyi qətnamələrin icrasını özü təmin etdi.
Milli Məclis Sədrinin müavini müharibədən sonrakı dövrdə işğaldan azad edilmiş ərazilərimizin dirçəldilməsi məsələsinə də toxunaraq, qısa müddət ərzində şəhər və rayonlarımızın bərpa olması üçün görülən işlərdən danışıb. Qeyd edib ki, mədəniyyət paytaxtımız olan Şuşa şəhərində keçirilən Xarıbülbül musiqi festivalı şəhərin tarixi kimliyini özünə qaytardı.
Azərbaycan cəmiyyətinin multikulturaldəyərlərindən danışanvitse-spiker, ölkəmizdə heç bir zaman dini, etnik ayrı-seçkiliyin olmadığını qeyd edib. Bildirib ki, Vətən müharibəsi xalqımızın birliyini, əzəmətini dünyaya göstərdi. Adil Əliyev ölkəmizdə yaşayan bütün icmaların müharibədə təmsil olunmasını, habelə ordumuzda bir nəfər də olsa, fərarinin olmamasını iftixarla qeyd edib.
Səmimi görüşə görə təşəkkürlərini bildirən qonaqlar, bundan sonra da həm yerli, həm də xarici media orqanlarında haqq səsimizin dünyaya çatdırılmasını, habelə şəhid ailələrinə və qazilərimizədiqqət və qayğıgöstərilməsini hər zaman diqqətdə saxlayacaqlarınıqeyd ediblər.
Sonda görüş iştirakçılarına Vətən müharibəsində arxa cəbhədə göstərdikləri xidmətlərə görə Milli Məclisin Gənclər və idman komitəsinin Fəxri Fərmanı təqdim edilib.