“Avropa İttifaqı ilə Azərbaycan arasında geniş əlaqələr var. Hazırda Avropa İttifaqı tərəfindən həyata keçirilən “Şərq tərəfdaşlığı” proqramı çərçivəsində müxtəlif əlaqələrin inkişafı üçün imkanlar açılır”.
DİA.AZ xəbər verir ki, bunu sabiq xarici işlər naziri, diplomat Tofiq Zülfüqarov deyib:
“İstənilən halda görüşlərdə bu mövzular müzakirə olunur. Lakin biz başa düşməliyik ki, Brüssel görüşünün öz xüsusiyyətləri var. Çünki əsas məsələ Ermənistan-Azərbaycan münaqişəsinin postkonflikt dövründə Avropa İttifaqının bu proseslərdə iştirakı barəsində geniş müzakirələr aparılıb”.
Diplomat bildirib ki, Brüssel görüşündəki bir neçə müsbət elementləri qeyd etmək lazımdır:
“Artıq Avropanın iqtisadi və siyasi baxımdan ən mötəbər təşkilatı olan Avropa İttifaqı Azərbaycanın təklif etdiyi yanaşmanı qəbul edib. Keçirilən müzakirələr ilk növbədə postkonflikt dövründə humanitar yardım barəsindədir. Çünki Azərbaycanın qarşısında duran əsas məsələ işğaldan azad olunan ərazilərə vaxtilə didərgin düşmüş insanların qayıtmasını təmin etməkdən ibarətdir.
Bu baxımdan, hazırda infrastrukturun bərpası, minaların təmizlənməsi, kommunikasiyaların bərpası kimi böyük problemlər mövcuddur. Hesab edirəm ki, bu müzakirələr çox vacib bir hadisədir. Bunun nəticələrini isə yaxın gələcəkdə görəcəyik”.
0