capar.info : - Ermənistan Kommunist Partiyasının birinci katibi Yercanik Qazaryan bildirib ki, Ermənistanın Rusiya və Belarus Birliyinə daxil olması qeydsiz-şərtsiz baş verməlidir.

Cebhe.info xəbər verir ki, bu barədə erməni mətbuatı yazıb.

"Bu, Ermənistan iqtisadiyyatına, təhlükəsizliyinə və erməni dövlətçiliyinin formalaşmasına müsbət təsir göstərəcək. Bunun üçün inteqrasiya proseslərinin genişləndirilməsi tələb olunur", - deyə Qazaryan qeyd edib.

"Gənc mütəxəssislər Rusiyaya gedir və ingilis dilində əla danışırlar, lakin çox zəif rus dilinə malikdirlər, buna görə də məktəblərdə rus dili dərslərinin sayını iki dəfə artırmaq və rus məktəblərini yenidən qurmaq vəzifəsi qoymalıyıq", - deyə Qazaryan bildirib.

Kommunist Partiyası liderinin fikrincə, bu assimilyasiya deyil, iki qardaş xalqın inteqrasiyasıdır.

"Mütəxəssislərimizin Rusiyada işləməsinə, təhsilini davam etdirməsinə və sonra Ermənistana qayıtmasına kömək etməliyik. Əks təqdirdə, insanların ildən-ilə ölkəni tərk etdiyini görəcəyik", - o əlavə edib.

Qazaryan bildirib ki, indi Ermənistanda Soros fondlarından qrant alan və digər ölkələrin daha çox yardım göstərdiyi fikrini formalaşdıran bir çox siyasi fiqurlar var:

"Amma bu belə deyil", -deyə partiya sədri qeyd edib.