capar.info : - Sabiq birlik komandiri, general-leytenant Rövşən Əkbərovun sabaha təyin olunan cinayət işi üzrə məhkəmə iclası təxirə salınıb.

Bu barədə Bizim.Media-ya 19 il əvvəl Kiyevdə qətlə yetirilən iş adamı Elçin Əliyevin anası Səmayə Əliyeva bildirib.

Onun sözlərinə görə Rövşən Əkbərovun səhhətində narahatlıq yarandığı üçün sabahkı məhkəmə iclası təxirə salınıb.

Səmayə Əliyeva növbəti məhkəmə iclasının nə vaxta təyin olunacağından hələlik xəbərsiz olduğunu deyib.

Rəsmi məlumata görə Rövşən Əkbərov 2001-ci il mayın 31-də aralarında olan mübahisə zamanı Elçin Əliyevin ürək nahiyəsinə kəsici-deşici predmetlə xəsarət yetirib və onu qəsdən öldürməsinə əsaslı şübhələr müəyyən edilib.

Rövşən Əkbərova Cinayət Məcəlləsinin 12.1, 120.2.2 (qəsdən adam öldürmə) və 12.1, 221.3-cü (xuliqanlıq) maddələri ilə ittiham elan edilərək, barəsində məhkəmənin qərarı ilə həbs qətimkan tədbiri seçilib.

Onun barəsində olan cinayət işinin istintaqı başa çatdırılaraq baxılması üçün Bakı Hərbi Məhkəməsinə göndərilib.

Xatırladaq ki, sabiq birlik komandiri, general-leytenant Rövşən Əkbərovun cinayət işi üzrə sonuncu məhkəmə iclası sentyabrın 8-də Bakı Hərbi Məhkəməsində keçirilib.