“O verilişləri görən kimi əsəbiləşib kanalı dəyişirəm. Bizim bu telekanallar məhkəməyə, hüquq-mühafizə orqanlarına aid olan işləri efirə çıxarırlar, amma bu lazım deyil. Adama deyərlər ki, sənin nə işinə qalıb kimsə arvadını niyə boşayıb”
Bunu Moderator.az-a açıqlamasında Xalq şairi Vahid Əziz deyib. V.Əziz efirlərdə yayımlanan şou xarakterli ailə-məişət problemlərinin insanları çaşdırdığını bildirib:
“Bunun üçün məhkəmə var, qadın hüquqları komitəsi var. Aparıcı kimdir ki, vətəndaşı ittiham edib, bunun hesabını sorur. Mənə belə gəlir ki, telekanalların çox olması cəmiyyətin əxlaqını pozdu. Savadsız adamları efirə çıxarıb, qışqır-bağır salırlar və sanki qəsdən bunu edirlər ki, millətin səviyyəsini aşağı salsınlar. Amma məsələ bundadır ki, dediklərimizə baxan yoxdur. İdeologiya yoxdur, çox aşağı səviyyədədir. Bizim ideologiyamız dövlət başçımızın, qeyrətli oğullarımızın hesabına oldu və ermənilərə qalib gəldik. İndi də iki-üç nəfərin hesabına ideoloji mübarizəmiz gedir. Amma ölkə daxilində ideoloji fəaliyyət yoxdur. Çox təəssüflər olsun. Mənə elə gəlir ki, Prezident Aparatında ideoloji şöbədə bu məsələyə ciddi nəzarət edən bir adam olmalıdır. Mətbuat Şurası bu işləri idarə edə bilmir”.